شوفلى فيديو كليب لهيفاء

كنت قاعد زهقان قرفان كده ومضايق ، أصل بيتنا كان مش طبيعى كان مكهرب ومافيش حد طايق حد ، كله صوته عالى ومضايق ، ومن خنقتى قولت لنفسى تعالى نتفرج على فيلم ولا حاجة فى التليفزيون فقالتلى ماشى تعالى نتفرج ، وفوجئت بفيلم سهر الليالى والفيلم ده أنا بحبه جدا وماكنتش إتفرجت عليه غير مرة واحدة وكانت فى السينما من حوالى أربع سنين تقريبا ، وقررت إنى أجلس أشاهده يمكن نفسى تفرفش شوية وتتفرج على فيلم زى الناس وكنت مستعد نفسيا أنا كمان للإستمتاع بالفيلم ، إلا أنى وأثناء متابعتى للفيلم شعرت بإحساس غريب راودنى ، إحساس لم أتوقعه إطلاقا وهو الملل والضيق ، بل وصل بى ذلك الإحساس إلى درجة الإستفزاز من أحداث الفيلم والمشاكل التى يطرحها ، وسألت نفسى زهقانة ليه ؟ هو الفيلم ده مش كان عاجبك قبل كده ؟ قالتلى كان عاجبنى قبل كده أه ، إنما دلوقتى يعجبنى إزاى والبيت اللى إنت معيشنى فيه مكهرب كده ومافيهوش زيت ولا عارفين تجيبوا فيه عيش علشان تأكلوا ، واللحمة أصبحت لا تدخله إلا فى المناسبات، وقالتلى إنت عايز فيلم يعجبنى وهو كل المشاكل اللى بيطرحها بتتلخص فى أربع شباب واحد فيهم بيخون وهو متجوز جوازة زى الفل ، والتانى مافيش أى مشكله تمنعه من الجواز غير إنه خايف يتجوز ، والتالت بتاعهم مش عاجب المدام بتاعته ، والرابع غنى ومتجوز بس متجوز واحدة أغنى منه شوية ، وقالتلى إنت عبيط ولا إيه؟ كان يعجبنى زمان ماشى إنما دلوقتى هيعجبنى إزاى وليه ؟ وإنفعلت وكان هتسيبنى وتمشى ولإنى ماينفعش أقعد من غيرها لإنها نفسى فجلست أهدى فيها وأقولها أنا أسف إنى سمعتك الفيلم ده وهو إنتاج قديم والمشاكل بتاعتنا دى ماكنتش لسه ظهرت بالشكل ده ، وأقنعتها إنها تتفرج معايا على فيلم تانى وهو إنتاج جديد مش قديم ولا حاجة إسمه حين ميسرة وكمان قولتلها إنى سمعت خالد يوسف مخرج الفيلم بيتخانق مع حد فى التليفزيون وبيقوله إن لن أتخلى عن الشعب المصرى والفقراء بعد اليوم ، وإقتنعت بالفعل إنها تصبر عليا وتجلس تشاهد الفيلم ده معايا وبينما نحن نشاهد الفيلم فوجئت بها زهقانة برده ، وسألتها ليه زهقانة ؟ فأجابتنى ده كمان فيلم مش لاقية فيه نفسى وإنه فيلم بيتكلم عن العشوائيات وبمبالغة كمان وإحنا المفروض طبقة متوسطة ، لإنى عايشة معاك فى بيت دخله الشهرى لايقل عن ألفين جنيه مصرى ، والمفروض إن الألفين جنيه دول يخلونا نعيش من غير مشاكل ، يعنى نشترى زيت ونجيب عيش بسهولة ونأكل لحمة كمان ، يعنى من الأخر المفروض يخلوا البيت مش مكهرب كده ، ورغم إن كلامها كان منطقى إلا إنى إتخنقت منها ، لأنى لم أجد إجابة لها عن تساؤلها ، وإنفعلت وقولتها :
يعنى لا كده عاجب ولا كده عاجب؟ أعملك إيه يعنى ؟
فأجابتنى فى برود وقالت لى :
" شوف فيلم اللمبى أو شغلى فيديو كليب لهيفاء" ....

الحب ده كلام فاضى - مجلة كلمتنا

من الأخر بحبها وبحبها قوى كمان ، طول عمرها كانت فى خيالى ، والله رسمتها بكل تفاصيلها ، ملامحها ، شخصيتها ، طبعها ، ده حتى والله إسمها فوجئت إنه أكتر إسم بحبه من أسماء البنات ، وكنت مش مصدق ، طاير من الفرحة ، سعيد سعادة مش طبيعية ، بس المهم ما إترددتش ‘ بدأت أقربلها ويالهوى على كده فوجئت بيها عارفة إسمى،لأ لأ وإيه كمان قعدت تتكلم معايا وسألتنى سؤال وسألتها سؤال وقولتلها وقالتلى .................

طبعا أنا مش هأكمل الحدوتة دى ، عارفين ليه أصلها قديمة قوى وبقت شغل أفلام ، عارفين وأنا صغير -قال يعنى دلوقتى أنا كبير- كان لو حد قالى الحب ده كلام فاضى ، أنا كان ممكن أقتله ، أه والله أقتله علشان عامل واعى وهو أساسا دقة قديمة ومعقد ، حب إيه ده اللى كلام فاضى ؟ كنت هقول مجنون ده ولا إيه؟بس عارفين دلوقتى وبعد ماكبرت وعجزت وأصبح عندى من السنين 18 هأقولكوا على حاجة بس مش عايز حد يتهور عليا ، بصوا ياجماعة بصراحة بقى الحب ده كلام فاضى ، وجع قلب وتوتر وقلق ، عارفين إيه كانت ميزة الحب من وجهة نظرى ؟ ميزة الحب كانت المسئولية ، المسئولية فى إنك تكون قد كل كلمة بتقولها ، قد كل وعد بتوعده.المسئولية فى إنك تطير بخيالك وتكبر بأحلامك وفى عز ماخيالك يكون طاير وأحلامك بتكبر تكون إنت كلك ثقة فى إنك هتقدر تعيش الخيال ده وإنك هتقدر تحقق الأحلام دى .المسئولية فى إنك تكون قد الدخول من الباب ، وإنك وإنت قاعد مع والدها تكون قد كل كلمة بتقولها وتكون قادر تجاوب على أسئلته اللى هى فى ظاهرها أسئلة سهلة ، عارفين سهلة ليه؟ لإن ليها نماذج كتير وكمان بتكون متوقعة والتوقعات إستحالة تخيب ؟ ونموذج الأسئلة فى الغالب بيكون :-ـ عندك كام سنة ؟ ـ عندك شقة؟ ـ هتدفع مهر كام؟ ـ كام جرام شبكة؟ إلخ.....وطبعا زى ماقولت السهولة بتكون ظاهرية لإن الإجابات صعبة ومعقدة .عارفين ليه صعبة ومعقدة ؟ علشان بلدنا بدأت تضيق بينا ، الواحد مننا دلوقتى بيخلص تعليمه وهو متوسط عمره 23-24 سنة ، ولكن هل ياترى هيخلص تعليم ويتقدم على طول ولا يستنى شوية يبدأ يكون فيها نفسه؟وأول مراحل التكوين طبعا هى الشقة ، وبصراحة بقى العملية صعبة جدا أصلك هتكون لسه خريج جديد ومرتبك على قدك ده إن إشتغلت أصلا ، بس علشان ماأكونش متشائم قوى فأنا بفترض إنك إشتغلت ، بس أنا كمان مش هأقدر أغشك ، أصل أسعار الشقق نااااااار ، أصل إحنا فى بلدنا عندنا إحتكار للحديد ، أه والله والحكومة سايباه ، خصخصة بقى.وهنفرض إنك شاب صبوووور وصبرت شوية قيمة كام سنة كده وجبت شقة .ندخل بقى على الشبكة والمهر إلخ.... ، فدى مش مشكلة الدهب دلوقتى ب 150 جنيه الجرام ، ولنفرض -خد بالك إنى تانى مرة أفرض- إن ربنا قدرك وجبت الشبكة وعملت الفرح ، هل هيبقى عندك إستعداد تصرف بقى وتجيب العيش والزيت وتأكلها لحمة ؟ سامعك بتقول أه عندى إستعداد ، وأنا بقولك ياعم صلى على النبى ده زجاجة من الزيت تكلفك 11 جند -الجند لع الجنيه- وكيلو اللحمة تقريبا ب 45 جند -مع مراعاة الإختلاف من منطقة لأخرى . طيب والعيش هتجيبه منين إنت وهى ولا هتخليها تنزل معاك طابور العيش من الفجر .من الأخر وعلشان أنا طولت عليكوا وزمانكوا إتخنقتوا منى ، الحب مسئولية وطالما مافيش مسئولية يبقى الحب ده كلام فاضى لحين إشعار أخر ، إشعار تتغير فيه الظروف وتتبدل فيه الأحوال.

بابا حبيبى زهقان ليه ؟ مجلة كلمتنا مايو2008

هو أى نعم منطقة خطيرة جدا فى حياتى يصعب الإقتراب منها بس مهما كان ده بابا برده ، شايفه زهقان وحزين هو أى نعم على طول زهقان وبيبص لى بصات غريبة كده بس المرة دى زهقه جامد قوى ، حزين كده ومكسور لأ ومركز مع الجرايد اليومين دول زيادة عن اللزوم ، فكرت فى مخاطرة كبيرة جدا وهى إنى أروح وأسأله ماله؟ وبعد تفكير طويل وعميق قررت إنى أنفذ تلك المخاطرة ، بس طبعا قبل ما أنفذها قررت أقترب من بيتنا أكتر بمعنى الحالة المادية للبيت شكلها عامل إزاى ؟ يمكن تكون هى السبب؟ وفعلا دخلت المطبخ علشان أدردش مع ماما شوية وقولت أساعدها وأخدت منها البطاطساية ولسه هأحمرها وبجيب إزازة الزيت وأفضى ، فوجئت بماما تنفعل إنفعال شديد على غير عادتها معى قائلة لى : كل ده زيت؟ إنت ماتعرفش إزازة الزيت بكام ؟ إنت عايز باباك يطفش ويسيب لنا البيت من المصاريف ، هنا قولت بس خلاص هو ده اللى مزهق بابا ، وإنسحبت من المطبخ فى هدوء محاولا التفكير فى كيفية مساعدة أبى حتى يخرج من هذه الأزمة المالية الحادة التى قد تكون سببا فى أزمته النفسية ، وجلست أمام التليفزيون لعلى أجد ماأستطيع أن أطمئن به أبى ، يمكن حد من الجماعة اللى ماسكين البلد يطلع عليا بتصريح من التصريحات الحلوة بتاعتهم ، وفجأة وأنا بأستعرض القنوات غصب عنى والله فوجئت بقناة الجزيرة عليها لقطات فظيعة لأطفال صغيرة بتموت وأباء تصرخ وتستغيث وأمهات تبكى فراق أبنائها وناس عمالة تشتكى من الحصار وكانوا بيتكلموا عربى فركزت مع الخبر وعرفت إن كل ده بيحصل فى فلسطين ، حزنت جدا وقولت فى بالى ياحبيبى يابابا أكيد علشان كده زهقان وحزين ومكتئب ، ربنا معاك ويصبرك ، وسألت نفسى : ياترى أقوله إيه علشان أخفف عنه؟ المهم بعد تفكير ومجهود ذهنى فظيع حضرت شوية كلام علشان أبقى أعرف أتكلم معاه يعنى فى البلاوى والمشاكل اللى جوه وبره البلد دى لما أبقى أروح وأسأله إيه اللى مزهقك؟وفعلا قررت أخترق الغرفة التى يجلس بها أبى حتى أبدأ معه الحوار وتشجعت وسألته :-"بابا حبيبى زهقان ليه؟" فترك أبى الجريدة من يده ونظر لى نظرة بها الكثير من الحزن والأسى -أقسم كاد قلبى ينخلع لها- وقال لى :-" كل الجرائد بتقول فيه إحتمال الحضرى يرجع سويسرا تانى